الخميس، 3 يوليو 2008

واجب ومصارحة

هذا الموضوع تركه لي أحمد عبد اللطيف صاحب مدونة ( هلاوس أحمد عبد اللطيف )
بتمرير كراسة الواجب لى ومن شروط الواجب زى ما هتشوفوا انى ( ادبس ) مجموعه كمان معايا .
أذكر 6 أسرار قد لا يكتشفها من يقابلك أول مرة ؟؟؟
قوانين الواجب:
1. أذكر اسم من طلب منك حل هذا الواجب
2. أذكر القوانين المتعلقة بهذا الواجب
3. تحدث عن ستة أسرار قد لا يكتشفها من يقابلك للمرة الأولى..
4. حول هذا الواجب إلى ستة مدونين،
وأذكر أسماءهم مع روابط مدوناتهم في موضوعك.5
. اترك تعليق في مدونة من حولت الواجب عليهم، ليعلموا عن هذا الواجب
وعليه
سوف أجيب عن الواجبات بأول إجابة تخطر ببالي
ثم ( أدبس ) ستة آخرين مثلي
السر الأول كل النساء والبنات اللاتي كتبتهن في عشق البنات
حين قرأن مخطوط الرواية ( عشق البنات ) أتهمنني باتهام واحد وصريح :
إنني سرقت أرواحهن ، وكتبتها ،وخنتهن ...
والسر أنني بالفعل خنتهن جميعا
لأنني سرقت لحظات بعينها قصدت أن أسرقها ،
ولم أكن حيادية تماما في القبض علي تلك الأرواح ،
بل فعلت معهن ما يُسمي بالعامل المهيمن علي الشخصية ...
وأغفلت الكثير من الجوانب التي قد تبدو أجمل من لحظات خيانتي لهن ...
السر الثاني أنا بحب الرومانسية جدا
ولأن زوجي منذ أن تزوجني وهو يتهم رومانسيتي أنها رومانسية عبيطة أو أفلام عربي كما يسميها ،
فصرت أتعمد التظاهر بالقسوة والسخرية
وخنق ذلك الكائن الرومانسي داخلي
وحتى ضبطت نفسي أقوم بخنقه في كتاباتي ....
السر الثالث أنا بنسى جدا الأسماء .
. ذاكرتي بصرية وليست ذهنية ..
كلما قابت أحدا نسيت اسمه أشعر بقمة الخجل .
. وأظل أراوغ في الكلام وأقول يا جميل .. يا قمر .. ولا أذكر اسما مطلقا ..
بعضهم يعطف علي حالي فيذكرني بإنسانية باسمه في معرض الحديث ..
والبعض الآخر يفهم مراوغتي ويبتزني ويظل يسأل بإلحاح ها مش فاكراني ..
طيب أنا مين .. افتكري كده .. ساعتها أتمنى أن تنشق الأرض وتبلعني ...
السر الرابع بنتي جميلة قوي ..
فرحانة أنا بطولها وجمالها .
وبيني وبينكم فرحانة إن كل ما حد يشوفها ويعرف إنها بنتي يشهق ويعلن دهشته وعدم تصديقه أنها ابنتي
وإنها ممكن تكون أختي الصغيرة .
وأنا بيني وبينكم ببقى فرحانة أكتر علشان ده بيأكد إني لسه محتفظة بلياقتي
لدرجة تجعل الناس يرفضون أن يصدقوا أنني ممكن أخلف بنت زيها ...
يعني فرحانة إن الناس لسه شايفاني جميلة وصغيرة ودلوعة ..
هاها ها .. وجوزي بيتغاظ من الناس لما تصر على نقل الإحساس ده لي
وكأنه خايف أشوف نفسي عليه ..
هاها ها .. طيب بالذمة مش من حقي أحس إني لسه جميلة وصغيرة ودلوعة ... ؟
هو زعلان ليه ؟!
السر الخامس .. بنتي بتغير علي زي أبوها وأكتر
كل ما تلاقي حد يكلمني بود بتبقي نفسها تضربه
يا ترى غيرانة علي أبوها .. من ملاطفة الناس لي ..
ولا غيرانة مني ... ههههههههههههههههههههه
السر السادس أنا بحب كل كتابة حلوة ..
بتحمس لها موت .. وعمري ما حسيت بالغيرة من روائي أو روائية قدموا عمل مدهش
بل بالعكس أفضل أروج للكتابة الحلوة
وساعات كتير ناس وقفت جنب مشروعهم واتكلمت عنه كويس وساندتهم معنويا
وألاقيهم بيتكبروا قوي .
. أزعل ساعات ..
وساعات أقول يعني يا بنت أنت عايزاهم يصلوا لك علشان قلت في حقهم بقين حلوين
ههههههههه .. هههههههه
صباحكم فل وعنبر
والآن أنا بدبس كل من
نهي محمود ( كراكيب )
محمد الجابري ( دخان شيشة )
زين عبد الهادي ( تسابيح )
سهى زكي ( الساحرة الشريرة )
اجندا حمرا
أحمد ثروت ( حداويت )

هناك 26 تعليقًا:

Ahmad Abdulatif يقول...

جميل أوي يا هويدا ، أنا فعلا استمتعت بسماع أسرارك وضحكت كمان من خفت دمك ، وأنا كدة خلاص هاستغل اسرارك اسوأ استغلال وكل ما أشوفك ( حتي لو ما شفتش بنتك ) هاقول لك : ياه ، مش معقول عندك بنت كدة!!!!!!!!!!!!
بالنسبة للأسماء ، برضو دي مشكلتي ، بس ما تقلقيش ، مش هانسي اسم هويدا صالح ، بس اوعي تقولي لبنتك !!!!!!!!!!

Ahmad Abdulatif يقول...

هويدا
علي فكرة أنا ضفتك عندي في اللينكات المهمة عشان أوصل لمدونتك بسهولة . دا بعد اذنك طبعا

_ زين_ يقول...

الفنانة الرقيقة الصعيدية جدا هويدا
يابت ياهويدا
الحقيقة يعني ومن غير مجاملة ومش عارف بنتك هاتغير ولا لأ أنا استمتعت جدا بروايتك واستمتعت بكلام في هذا البوست لأنه طالع من القلب وبتكشفي فيه أسرار المهنة، وأعتقد أنك لاتختلفين كثيرا عن عم نوح، نفس روح البساطة والتلقائية والمحبة لطوب الأرض.
أنا الحقية باكتشف من تاني العالم بعد غيابي القسري لسنوات طويلة، عموما أنا كتبت حاجه زيك كده من 3 شهور تقريبا وموجود عندي على المدونة بس انزلي لتحت تلاته أربعه بوست
تحياتي وتمنياتي لنوح وليكي ولبتنا العزيزة
أخوكي
جاد الحق زين جاد الحق
من ديروط غربية
وماحدش يزعل هاه

كراكيب نـهـى مـحمود يقول...

صديقتي الجميلة
كلامك جميل اوي اوي
وانساني جدا
شكرا على الواجب اشتريت كراسة وقاعده اشتغله
محبتي

مؤنسة قرص الشمس يقول...

يا هدهودة
جميل قوي الكلام ده
وأحمد ثروت في حداويت دبسني زيك
ههههههههههههههه
يعني هربت منك جابني أحمد ثروت
يلا زي بعضه ولو إني طول عمري مش بحب الواجب .. بكره الهوم وورك والمذاكرة
تلميذة فاشلة يعني
هههههههههه

هويدا صالح / عشق البنات يقول...

جميل يا أحمد
بس بلاش تستغل الأسرار دي قوي
خليها بيني وبينك
هههههههههههه
وإوعاك تنسي اسمي ازعل منك قوي
يلا خلص ساراماجو الجديد
وعايزين نشوفك قريب

هويدا صالح / عشق البنات يقول...

دكتور زين
أجدع صعيدي سويسي قنالي
وحياة الإله أبوللو الصغير أنت راجل زي السكر
خلي بالك أبو نوح مستنيك فلا تنس الوعد ...

هويدا صالح / عشق البنات يقول...

نهي محمود يا أجمل بنوتة
متخليش الدباديب تساعدك
ده واجبك لوحدك
بوسة علي خدك اليمين

هويدا صالح / عشق البنات يقول...

ماشي يا إيزيس
يعني حداويت أثر فيك أكثر مني
طيب أوكي

حداويت يقول...

ميرسي يا هويدا على التدبيسه الجميلة دي ..
بس محيرني اختيارك ليا .. و أخيراً وصلت للسر ..
واضح إن جمهور مدونتي زادوا واحد... و ضربت رقم قياسي جديد .. مدونتي بقى لها هدد 6 قراء..يا ألف نهار أبيض.. لوولوليليلييي..

fawest يقول...

أهلا بك فى عالم التدوين!!





..................
بس شيلى تأكيد الكلمة
من السيتنج

Ahmad Abdulatif يقول...

هويدا
رواية " البصيرة " خلصتها من زمان ومستنية النشر ، ولسه مخلص ترجمة " ثورة الأرض " من كام يوم،وهاسمها الاسبوع لدا لدكتورة سهير.
أهو ن مش مقصر فحاجة؟

Heart Beat يقول...

جميل جدا الاسرار دي

ربنا يخلي لك بنتك و تفضلوا دايما كده على طول الناس تشوفكم تقول اخوات

الرومانسية احساس جميل جدا ... احتفظي به دايما و لا تتخلي عنه ابدا مهما كانت الاسباب

اما عن الذاكرة فأنا شخصيا بنسى حدوث مواقف معينة بعد حدوثها بأقل من دقيقة

و في مناسبة اخرى ... مرة قابلت شخص ما يف الشارع و تعرف علي و هو بالنسبة لي شخصية مألوفة يعني انا كنت متأكدة اني اعرف الشخص ده ,,, و سألته عن زوجته و اولاده و عمله الآن كانت المعلومات اللي قالها في ردوده عليا كلها مألوفة بالنسبة لي ... الا شيء واحد مين الشخص ده بالظبط

لما مشي قلت لصاحبتي اللي كانت واقفة جنبي ... انا متأكده اني اعرف الشخص ده بس هو مين مش قادره افتكر... فكان ردها ... الله يكون في عون اللي يعرفك ... ده زميلك اللي ساب الشغل من شهرين و كان بقى له معاكي تلات سنين .... قلت لها ... ايوا صح افتكرته ... طيب هو اسمه ايه بقى ... سابتني و مشيت

حقيقي لما بتكون الذاكرة سيئة بتحصل مواقف ما يعلم بيها الا ربنا

الله يكون في عونك و تتذكري الاسماء احسن فعلا مواقف نسيان الاسماء دي بتكون سيئة بشكل كبير اوي

تحياتي

هويدا صالح / عشق البنات يقول...

صباح الخير حداويت
لما تحل الواجب قل لي
علشان أشوف كل الأسرار

هويدا صالح / عشق البنات يقول...

طه عبد المنعم
مرحبا بك في مدونتي
حذفت لك كلمة تأكيد التعليق
شكرا لك

هويدا صالح / عشق البنات يقول...

أممد العزيز
يسعدني أن أطلع على كل جديدك
وجميل هذا الاختيار النوعي لما تترجم
تحية معطرة لك

هويدا صالح / عشق البنات يقول...

هيرت بيت العزيزة
جميل أن نتفق
والأجمل مرورك
أتابعك أنت واجندا الجميلة
ربنا يصلح نتها ويرفع خطها ويرضي عنها المهندس
ههههههههههه
قرأت ما كتبت وضحكت من قلبي
تحياتي لكما

محمد حلمي مخلوف يقول...

كويس ان حضرتك معندكيش الغيره الفنيه
ولهذا ادعوك لمدونتي لأني اكيد هاكون سعيد جدا برأي كاتبه في وزن حضرتك

محمد حمدي يقول...

اسرار جميله وبسيطه وبجد مدونه رائعه وقلم حساس

ياريت تشوفى مدونتى

تحياتى

هويدا صالح / عشق البنات يقول...

حمد حلمي مخلوف
صباح الخير
سأمر عليك فانتظرني
جهز الشاي والكيك

هويدا صالح / عشق البنات يقول...

محمد حمدي
صباح الفل
شكرا لمرورك
وأكيد سآتي

غير معرف يقول...

عزيزتي هويدا

استمتعت بقراءه اسرارك و الدخول الي عالمك
و ربنا يخاليكم لبعض انتي و بنتك و دايما كده الناس تفتكركم اخوات
:)

مرسي علي التدبيسه بتاعت الواجب و اوعدك اني حجاوب عليه قريب انشاء الله
تحياتي ليكي ياقمر

غير معرف يقول...

مرسي ياقمر علي دعواتك بخصوص المشكله اللي كانت عندي
كان اسبوع مايعلم بيه الا ربنا
بركه انه عدي
مع تحياتي ياقمرايه

هويدا صالح / عشق البنات يقول...

اجندا يا غالية
حمد لله على سلامتك
وحشتيني يا قمر
لك وحشة بجد
كنت كل يوم بدور عليك
لغاية ما عرفت من هارت وإيزيس إن النت فيه مشكلة
كنت تعالي ادخلي ايميلك من عندي
فركة كعب
حلوان مش بعيدة
نهي محمود صاحبة مدونة كراكيب هتلملم دباديبها وتيجي عندي
حتى شوفي
الدباديب واقفين في البلكونة بيهيصوا
رايحين حلوان رايحين حلوان

غير معرف يقول...

صديقتي الحبيبه هويدا

جاوبنا يافندم علي الواجب و يارب اكون من الناجحين
حستناكي تيجي تصلحيلي الواجب ماتتأخريش بقه و كل واجب و انتي بخير ياقمر
تحياتي ليكي

هويدا صالح / عشق البنات يقول...

اجندا العزيزة
سأحضر
بس بحضر بوكيه ورد علشان أقدمه لك لما يعجبني الواجب